美洲金盃8強，主辦國之一美國惡鬥哥斯達黎加。美國喺金盃及時甦醒，3戰全勝而且只失1球，哥斯達黎加喺美洲只屬一線尾球隊，多年嚟都對美國、加拿大同墨西哥構成唔到威脅，美國近6次對哥斯達黎加贏5次，熱捧主勝。（無綫myTV SUPER周一早上7時直播）

愈踢愈好帶挈票房

美洲金盃今屆畀同樣喺美國舉行嘅世冠盃搶晒風頭，雖然世冠盃於東岸城市上演，而美洲金盃集中喺西岸舉行，但票房收入受到好大影響。即使東道主美國嘅賽事，頭2場分組賽都係僅僅過1萬人入場，最後一場對海地就回升到2萬球迷，總算鬆一口氣。

球迷入場意欲低，唔多唔少都關成績事。「花旗國」喺金盃之前錄得4連敗，2場中北美聯賽事同2場熱身賽，連續輸畀巴拿馬、加拿大、土耳其同瑞士，領隊普捷天奴執教能力被質疑，好彩球隊喺決賽周一場踢得好過一場，氹番班球迷，3場接連擊敗千里達、沙特阿拉伯同海地，合共入8粒只失1球，重拾信心。

哥斯達黎加小組2勝1和，同墨西哥最後一場互交白卷，兩隊同分但輸得失球排次席。哥軍贏嘅兩場對手，只係世界排名139嘅多明尼加共和國，同埋排137嘅蘇里南，含金量一般，加上哥斯達黎加球員主要效力國內球會，整體實力及經驗難同美國相比，而且佢哋近6次鬥美國輸足5次，未踢先輸氣勢，今場都好難有爆冷空間。