今晚世冠盃16強大戰，巴黎聖日耳門（PSG）同國際邁亞密爭晉級。PSG實力高幾班，贏波機會高唱入雲，不過阿根廷球王美斯首次倒戈呢支法甲勁旅，誓要報番當年畀對方球迷羞辱之仇；國際邁亞密防守唔掂，往往前面入埋唔夠後面輸，近6場有4次總入球開4球或以上，最好揀中位數3.5球嘅入球大。（周一凌晨零時開賽）

PSG喺西班牙名帥安歷基執教下，以行雲流水足球征服歐洲，繼歐聯決賽大炒國際米蘭5比0之後，首場世冠盃再贈馬體會4蛋，攻力非常誇張。雖然佢哋第2場世冠盃0比1不敵保地花高，但其實創造大量攻勢，上仗輕取西雅圖海灣者兩蛋，充滿說服力。既然佢哋已經有同美職球隊交手經驗，了解當地足球水平，今仗鬥邁亞密大可放膽主攻，有利出現入球騷。


國際邁亞密擁有美斯、蘇亞雷斯及布斯基斯等名將，心態上以「強隊」自居，即使遇上真正豪門，亦唔會刻意退縮防守，第2場分組賽落後下，都可以反勝波圖2比1，上場鬥巴西勁旅彭美拉斯，領先2球被逼和2比2，充分反映攻強守弱特質。

世盃奪冠同法國球迷反面

今場美斯仲有啲「私怨」要解決，佢喺2022年效力PSG期間，於世界盃決賽帶領阿根廷擊敗法國，得罪PSG球迷慘遭針對，加上當時會方要求佢減薪先肯續約，搞到美斯憤而離隊加盟邁亞密。美斯之前亦承認效力PSG兩年「唔太開心」，新仇舊恨交織之下，今場肯定搏老命向對方還以顏色，無論輸贏，起碼要爭取入波，雙方不乏入波決心，大盤穩開。