周六凌晨英超獨腳戲，李斯特城主場對賓福特。「狐狸」近況低迷，近3戰全敗僅入1球，現時排聯賽19位深陷降班漩渦，再睇佢哋近5場聯賽主場成績，竟然全部輸晒，反觀對手「蜜蜂」近3場聯賽作客全勝，憑此已經可以判斷，賓福特客勝高唱入雲。
（Now 621周六凌晨4時直播）
李城頹爆雲佬冇晒計
李斯特城現時情況惡劣，季中接手球隊嘅雲尼斯達萊愈帶愈差，對於護級前景，「雲佬」暫時都冇咩辦法，有分析指「狐狸」季尾13輪賽事，只有對韋斯咸、修咸頓同葉士域治有搶分機會，今場要喺賓福特搶分成功，非要有超水準表現不可。近期「雲佬」委任前李斯特城英超冠軍成員安迪京治加入教練團，希望可以帶動隊內氣氛，但都好難立即見效。


賓福特現時排聯賽11位，但表現時好時壞，原因在於佢哋踢法開放，25場聯賽入43球失42球，極富娛樂性，而主帥法蘭克嘅拿手好戲係開賽初段嘅「快速奔襲」，麥比奧莫同尤尼韋沙喺呢方面合作無間，李斯特城嘅防線應該好難頂得住，加上佢哋近期作客表現好過主場，近3場勝仗都係作客，所以今場客勝可睇高一線。