今晚意甲祖雲達斯主場同國際米蘭合演「國家打吡」，呢兩支傳統勁旅交鋒往往非常謹慎，特別係祖記今季由莫達接手後，戰術異常保守，24場聯賽有13場打和。國米近況稍見下滑，加上射手馬古斯杜林有傷在身，或影響攻力。睇番兩隊近7次對賽，6次總入球開2球或以下，首選中位數2.5球嘅入球細。（HOY TV 76台周一凌晨3時45分直播）

杜林有傷損「藍黑兵」火力
意甲目前3強鼎立，冠軍屬拿玻里、國際米蘭同阿特蘭大之爭，祖記則要為前4而戰，佢哋近期3連勝睇落唔錯，但其中兩場對手係護級弱隊安玻里同科木，不宜作準。事實上祖記遇強冇甜頭，早前打和阿特蘭大1比1，之後輸畀拿玻里，今仗遇上2哥國米難有優勢，加上周中歐聯附加賽次回合作客燕豪芬，有後顧下更加綁手綁腳。

國米近3場聯賽僅1勝，搞到落後榜首拿玻里1分，前鋒馬古斯杜林上場對費倫天拿28分鐘就傷出，呢位法國國腳今季意甲入13球，屬「藍黑兵團」聯賽首席射手，就算勉強帶傷上陣必有影響，寧博入球細。