地頭出擊例搶韁 另一場南球盃淘汰賽附加賽首回合,厄瓜多爾勁旅利加大學主場出擊,硬撼玻利維亞球隊阿爾韋斯列迪。利加大學一向靠主場搵食,經常採取先發制人策略,阿爾韋斯列迪隨時半場都頂唔住,半場主勝有計。
(周五早上8時30分開賽) 利加大學不嬲都係南美賽事常客,佢哋今屆原本係踢自由盃,不過喺D組撞正勇銳嘅青年體育會同保地花高,最終以3分落後呢兩隊,無緣首兩名出線資格,以第3名降格出戰南球盃。當然利加大學對南球盃絕對唔陌生,佢哋上屆由第1圈開始,過關斬將之下,最終喺決賽以互射12碼擊敗巴甲球隊福塔雷薩,第二度稱霸此盃,如今喺自由盃出局,反而獲得衞冕南球盃機會,不容忽視。
阿爾韋斯列迪作客曳 另邊廂,阿爾韋斯列迪實力平庸,今屆喺南球盃A組只得3勝2和1負,僅獲次席出戰淘汰賽附加賽,值得留意嘅係,呢3場勝仗全部來自主場,意味住失去高原地利之助,佢哋表現將再打折扣。利加大學唔單止質素勝一籌,佢哋主場出擊特醒,近8次主場賽事,取得6勝1和1負,其中7次喺上半場已取得領先優勢,可見呢班波喺自己地頭非常搶韁,半場主勝捧得過
|