今晚歐國盃16強頭場,奪標大熱門英格蘭硬撼斯洛伐克。「三獅兵團」分組賽進攻冇Form,踏入淘汰賽為免有乜閃失,主帥修夫基勢必繼續其「悶蛋足球」;斯洛伐克有自知之明,唔會輕舉妄動,鬥謹慎下唔慌多波入,2.5球入球細乃明智之選。(Now 618及688周一凌晨零時直播)
英格蘭坐擁哈利卡尼、祖迪比寧咸、菲爾科頓及布卡約沙卡嘅星級鋒線,但個個各自為戰,完全冇化學作用,今屆3場分組賽入得兩粒咁大把,進攻毫無章法,就算能夠先入波,亦會立即龜縮防守,場場都悶到瞓着,修夫基自然備受一眾名宿同粉絲猛烈批評。但你咪理,「三獅兵團」仍以1勝2和取得C組首名,仲喺淘汰賽去到冇乜傳統勁旅嘅下線,相當有運仔。
嚟到淘汰賽階段,斷估修夫基都唔會突然開竅,改善到球隊進攻,加上佢哋以往經歷太多「轟烈敗仗」,包括上屆決賽飲恨,「修哥」寧願踢穩陣波悶悶地贏,甚至覺得咁樣做先有奪冠機會,況且兩名左閘捷比亞同勞基梳爾,唔係有傷就狀態未足,隨時成為隱患,英格蘭球員分分鐘踢得更保守。睇番佢哋近10場歐國盃,法定時間內有9次係1球起、2球止,可見細盤相當穩陣。
斯洛伐克踢法務實 另邊廂,斯洛伐克吸取上屆分組賽旗開得勝再連輸兩場嘅教訓後,今屆踢得更務實,喺E組3戰錄勝和負各一,於4隊同得4分、對賽相同之下,憑較佳得失球力壓烏克蘭唔使包尾,以其中一支最佳第3名躋身16強,尤其尾輪同羅馬尼亞嘅「默契和波」,成為球壇焦點,今日遇上英格蘭,佢哋勢必擺下「鐵桶陣」,好大機會又悶戰一場,細盤必揀。
|