美洲盃C組另一場，首戰贏波嘅烏拉圭乘勝追擊，火併玻利維亞。烏拉圭喺「瘋帥」比爾沙執掌下，踢法積極進取，達雲紐尼斯踢國家隊交到貨，唔愁冇波入，玻利維亞防線紙咁薄，經常半場都頂唔住，近3場半場全開2球或以上，推介1.5球半場大。（HOY TV 77台周五早上9時直播）

玻利維亞「豆腐後防」
烏拉圭擁有蘇亞雷斯、達雲紐尼斯及費達歷高華維斯等好波之人，不過領隊比爾沙暫時唔需要用到老大哥蘇亞雷斯住，預料分組賽最後一場先畀佢出嚟輕舒腳頭，為淘汰賽準備，全因為達雲紐尼斯交到貨。呢位利物浦前鋒喺啱啱過去一季英超表現漸入佳境，國家隊演出更加光芒四射，美洲盃前最後一仗熱身賽，佢就連中三元助烏拉圭大勝墨西哥。嚟到決賽周首戰3比1贏巴拿馬，佢亦有一粒進帳。烏拉圭今場贏波就可提早出線，佢哋近6次鬥玻利維亞，5次半場領先，實力明顯高一班。

玻利維亞離開主場威力大減，加上近況不濟，近7場輸6場，當中5場半場落後，包括上場對美國半場吞兩蛋，近3仗半場全開2球或以上，「豆腐防線」難頂烏拉圭狂攻，半場大穩開。