今晚另一場歐國盃C組首輪賽事,斯洛文尼亞硬撼丹麥。斯洛文尼亞雖然近況唔錯,但大賽經驗嚴重不足,撞正又弗又經驗豐富嘅丹麥,凶多吉少,客勝有計。(Now 618周一凌晨零時直播)
斯洛文尼亞與丹麥繼喺歐國外同組後,再喺歐國盃狹路相逢,斯洛文尼亞喺歐國外10戰錄7勝1和2負,獲次名出線,論近況,斯軍之前12場錄8勝3和僅1敗,狀態絕對唔失禮,連同鋼門奧比歷助陣同班捷文施斯高等新星冒起,不容忽視。不過,打大賽好講經驗,斯洛文尼亞上次出戰大賽決賽周,已經係2010年嘅南非世盃,若單計歐國盃決賽周,上次參賽要數到2000年,足足24年前嘅事,依家班波完全缺乏經驗。
近年交手5勝1和未輸過 相反,丹麥經驗贏斯洛文尼亞幾條街,連同今屆在內,近11屆歐國盃9度進身決賽周,除咗1992年以臨時替補身份締造童話式奪冠外,上屆亦殺入4強,上屆首仗對芬蘭時,一度因心臟病發瀕臨死亡邊緣嘅基斯甸艾歷臣,已經康復今屆繼續領軍,佢哋近3場全勝,防中賀積查治更場場有士哥,令人喜出望外。而且丹麥專剋斯洛文尼亞,近6次碰頭獲得5勝1和,包括喺歐國外錄1勝1和,令佢哋壓過同分嘅斯軍取得首名出線,擺明格食格,今仗有力旗開得勝。
|