另一場A組首輪賽事，東道主卡塔爾U23迎戰印尼U23。卡塔爾大國腳剛於2月捧走亞洲盃，但一班小國腳仲有待磨練，近兩屆U23亞洲盃都係分組賽出局，期間6戰不勝，包括5場打和。印尼U23首次打入決賽周，實力同經驗稍遜，預料會採取穩陣戰術，不妨博和波。（HOY TV 76台周一晚11時30分直播）
卡塔爾近年連續舉辦世盃、亞洲盃同U23亞洲盃，決心振興當地足球發展。不過該國青訓就出現斷層，U23國家隊愈踢愈頹，雖於2016及2018年打入U23亞洲盃4強，但近兩屆都喺分組賽畢業，而且6戰夾埋入得6粒，攻力甚為疲弱。不過佢哋防守尚算穩陣，導致出現近6場U23亞洲盃分組賽，有5場和波嘅情況。
印尼首度亮相但求唔輸
至於首次喺U23亞洲盃決賽周亮相嘅印尼，實力無疑屬小組最弱一隊，加上近期比賽頻頻輸波，球員狀態及信心同樣令人擔憂，小組首戰想砌低東道主，機會微乎其微。事實上，印尼U23打入今次決賽周已經收晒貨，旨在吸收比賽經驗，相信會以防守行先，但求不敗有分數落袋，就對球迷有所交代，預計兩隊會出現攻防戰，隨時開出和波唔奇。
|
