今日下晝韓職有場中下游對決，由FC江原主場鬥FC首爾。FC江原開季戰績麻麻，就算主場出擊亦唔敢輕舉妄動；FC首爾雖有連格壓陣，但呢位前英格蘭國腳加盟後冇乜料到，2.5球入球細穩開。（無綫myTV SUPER周日下午1時直播）

FC江原狀態麻麻，開咧後3場聯賽，只得2和1負仲未贏過，雖然佢哋3場都先開紀錄，但場場都有失波導致失分，其中上場對住實力平庸嘅大田市民都頂唔住，完場前被對手逼和1比1，到口嘅「肥豬肉」都嘔番出嚟，可見班波堅唔順，防線受壓下即現漏洞。就算今日返番主場，FC江原喺球員缺乏信心下，相信都會先做好防守，唔敢亂攻。

「連王」狀態未谷起
另邊廂，FC首爾今季簽入前曼聯中場連格，頓時成為球迷焦點，畢竟呢位前英格蘭國腳無論策動進攻，抑或埋門一腳都具級數，以為可以即時提升首爾嘅實力。可惜「量地」一排嘅連格似乎「Hea慣」返唔到轉頭，唔單止未操起狀態，連比賽態度都惹來球隊同粉絲不滿，頭3輪聯賽都只係後備落場，仲要入波同助攻統統交白卷，暫時睇落就貨不對辦。

既然「連王」來投無助進攻，FC首爾只能從防守着手，佢哋開季3仗錄1勝1和1負，全開2球或以下，包括上場對濟州聯早早領先兩粒下，都大踢悶蛋足球保住2比0勝局到完場，今場作客隨時踢得更保守，入球細有捧場價值。